काठमाडौँ स्थित दरबारमार्गमा रहेको एमसीसी, नेपालको कार्यालयमा नेत्र विक्रमचन्द नेतृत्वको नेकपा र मोहन बैद्य किरण नेतृत्वको नेकपा (क्रान्तिकारी माओवादी) सहितका विभिन्न राजनीतिक दलहरुले सोमबार कार्यालय घेराउ गरेका छन् । घेराउपछि आयोजित कोणसभामा बोल्दै नेकपा (क्रान्तिकारी माओवादी) का नेता सिपी गजुरेलले एमसीसी भनेको जनताको टाउकोमाथि तेस्र्याइएको तरबार भएको बताए । नेता गजुरेलले एमसीसीको विरोधमा आज (मंगलबार) संसद् भवन घेराउ गर्ने घोषणा पनि गरे ।
कार्यक्रममा नेता धर्मेन्द्र बास्तोलाले नेपालका लागि एमसीसी खतरनाक भएकोले खोरज हुनुपर्ने बताए । उनले भारतमा बजार विस्तार र चीनलाई भाँड्नका लागि अमेरिकाले नेपालमा एमसीसी ल्याएको आरोप समेत लगाए । उनले एमसीसी पास भएमा नेपाली सेना, पुलिस, कर्मचारीहरु एक अमेरिकी अधिकारीको इसारामा चल्नुपर्ने बाध्यता सिर्जना हुने दाबी समेत उनले गरे ।