सर्वशुलभ दङ्गबाट नागरिकहरुलाई स्तरीय स्वास्थ्य सेवा प्रवाह गर्दै आएको धुलिखेल सामुदायिक अस्पतालले थप सेवा विस्तारका लागि ट्रमा तथा इमरजेन्सी सेन्टर निर्माण कार्यलाई तिब्रता दिएको छ । धुलिखेल सामुदायिक अस्पतालमा निर्माण भइरहेको ट्रमा तथा इमरजेन्सी सेन्टरको भौतिक प्रगति करिब ५० प्रतिशत पुगेको छ । नेपाल सरकार र जापान सरकारको सहकार्यमा निर्माण भइरहेको १०० शैयाको ट्रमा सेन्टरको निर्माण कार्य तीव्र गतिमा अघि बढिरहेको अस्पतालले जनाएको छ । बिहीबार आयोजित पत्रकार सम्मेलनमा अस्पतालका प्रा.डा. दीपक श्रेष्ठले परियोजनाको निर्माण प्रगति करिब ५० प्रतिशते भएको बताउनुभयो । ट्रमा सेन्टर निर्माणका लागि कुल करिब ३ अर्ब ६० करोड रुपैयाँ खर्च हुने अनुमान गरिएको जनाउनुभयो । त्यसमध्ये करिब २ अर्ब रुपैयाँ भवन निर्माणमा र बाँकी रकम अत्याधुनिक स्वास्थ्य उपकरण तथा अन्य संरचनामा खर्च गरिनेछ ।
    अरनिको राजमार्ग र बीपी राजमार्ग हुँदै आवतजावत गर्ने नागरिक तथा ती राजमार्गले जोड्ने विभिन्न जिल्लाका दुर्घटनामा घाइते हुने बिरामीलाई तत्काल र विशेषज्ञ सेवा उपलब्ध गराउने उद्देश्यले धुलिखेल अस्पतालले ट्रमा तथा इमरजेन्सी सेन्टर निर्माणको अवधारणा अघि सारेको हो । अस्पतालले सन् २०१४ मै सम्बन्धित निकाय तथा जापान इन्टरनेशनल कोअपरेशन एजेन्सी (जाइका) नेपालसमक्ष ट्रमा सेन्टर निर्माणको प्रस्ताव अघि बढाएको थियो । 
    नेपाल सरकार र जापान सरकारको सहकार्यमा सन् २०२३ अक्टोबर तथा २०२५ मेमा जाइका नेपाल र अर्थ मन्त्रालयबीच ३.८७९ बिलियन जापानी येन बराबरको लागतमा १०० शैयाको धुलिखेल अस्पताल ट्रमा तथा इमरजेन्सी सेन्टर निर्माण गर्ने सम्झौता भएको छ । परियोजनाको कार्यकारी निकाय स्वास्थ्य तथा खाद्य स्वच्छता मन्त्रालय र कार्यान्वयन निकाय धुलिखेल अस्पताल रहेको छ । निर्माण कार्यका लागि जापानको टोडा कर्पोरेशन, टोकियो छनोट भएको थियो । जाइका नेपाल तथा स्वास्थ्य तथा खाद्य स्वच्छता मन्त्रालयका प्रतिनिधिको उपस्थितिमा सन् २०२५ अप्रिलबाट निर्माणको प्रारम्भिक काम सुरु गरिएको हो । परियोजनामा जापानी कम्पनी टोडासँगै नेपालको हिमालयन बिल्डर्स एण्ड इन्जिनियरिङलगायत कम्पनी पनि संलग्न रहेका छन् ।
    करिब १६ रोपनी क्षेत्रफलमा निर्माण भइरहेको उक्त ट्रमा सेन्टरको भवनको कुल क्षेत्रफल करिब ७४ हजार वर्गफिट रहनेछ । विपद्, आगलागी तथा अन्य आकस्मिक अवस्थालाई समेत ध्यानमा राखेर भवनको डिजाइन गरिएको प्राध्यापक डाक्टर दिपक श्रेष्ठले थप प्रस्ट पार्दै उल्येख गर्नुभयो । भवन निर्माणमा न्यूनतम तीन फिटदेखि १० फिटसम्मका पिल्लर प्रयोग गरिएको छ । निर्माणस्थलमा हाल करिब २५० जना कामदार परिचालन भइरहेका छन् । विभिन्न चुनौतीका बाबजुद निर्माण कार्य भने निरन्तर अघि बढिरहेको छ । अन्तर्राष्ट्रियस्तरमा देखिएका असहज परिस्थिति, नेपालमा आएको बाढी तथा अन्य विपद् र जेनजी आन्दोलनका कारण निर्माण सामग्री आपूर्ति, जनशक्ति व्यवस्थापन तथा परियोजना सञ्चालनमा केही समस्या आए पनि काम पूर्णरूपमा प्रभावित नभएको अस्पतालले जनाएको छ ।
    निर्माण सम्पन्न भएपछि ट्रमा सेन्टरमा सिटी स्क्यान, एमआरआई, अत्याधुनिक शल्यक्रिया कक्ष, भेन्टिलेटर, एक्सरे मेसिनलगायतका आवश्यक स्वास्थ्य उपकरण जडान गरिनेछ । अस्पतालका अनुसार अत्याधुनिक उपकरण तथा अस्पतालका बेडसहितको संरचना सन् २०२७ जुनसम्म हस्तान्तरण गर्ने लक्ष्य राखिएको छ । ट्रमा तथा इमरजेन्सी सेन्टर सञ्चालनमा आएपछि काभ्रेपलाञ्चोकसँगै रामेछाप, दोलखा, सिन्धुपाल्चोक, सिन्धुली र भक्तपुरका गम्भीर घाइते तथा आकस्मिक उपचार आवश्यक पर्ने बिरामीले तत्काल विशेषज्ञ सेवा पाउने अपेक्षा गरिएको छ । बीपी राजमार्गसँग जोडिएका तराईका जिल्लाबाट आउने घाइते बिरामीका लागि पनि यो केन्द्र महत्वपूर्ण हुने अस्पतालले जनाएको छ ।
    नेपालमा सडक दुर्घटनाबाट हुने मानवीय क्षति पछिल्ला वर्षमा बढ्दो क्रममा रहेको तथ्यांकले देखाउँछ । गत आर्थिक वर्षमा मात्रै देशभर २४ हजार ४८८ सडक दुर्घटना भएको तथ्यांक छ । ती दुर्घटनामा करिब ६ हजार व्यक्ति गम्भीर घाइते भएका थिए भने २ हजार ३७६ जनाले ज्यान गुमाएका थिए । नेपालमा दैनिक औसत पाँचदेखि छ जनाको सवारी दुर्घटनामा मृत्यु हुने अवस्था देखिन्छ ।दुर्घटनाबाट मानवीय क्षतिसँगै ठूलो आर्थिक क्षतिसमेत हुने गरेको छ । सो अवधिमा दुर्घटनाका कारण ५६ अर्ब ४४ करोड ६१ लाख ५६ हजार ८ सय रुपैयाँ बराबरको सम्पत्ति क्षति भएको तथ्यांक छ । दुर्घटनामा घाइते भएकाको उपचारमा मात्रै करिब ६८ करोड रुपैयाँ खर्च भएको बताइएको छ ।
    यातायात सवारी दुर्घटना तथा सडक दुर्घटनामा परी नागरिकहरुको अंगभङ्ग भइ बाँचन बाद्य छन् । नेपालका पहाडी क्षेत्रमा रुख, भीर तथा पाखाबाट लडेर हुने दुर्घटनाबाट घाइते हुनेको संख्या पनि उल्लेख्य छ । चोटपटकका कारण बिरामीले शारीरिक तथा मानसिक पीडा भोग्नुपर्ने मात्र होइन, परिवार र राज्यले समेत ठूलो आर्थिक तथा सामाजिक क्षति व्यहोर्नुपर्ने अवस्था छ । यस्तो अवस्थामा धुलिखेलमा निर्माण भइरहेको ट्रमा तथा इमरजेन्सी सेन्टरले गम्भीर घाइतेको उपचारमा महत्वपूर्ण भूमिका खेल्ने डा. श्रेष्ठको भनाइ छ । विसं २०५३ सालदेखि स्वास्थ्य सेवा सुरु गरेको धुलिखेल अस्पतालले तीन दशकको अवधिमा विभिन्न विशेषज्ञ तथा अत्याधुनिक सेवा थप गर्दै आएको छ । नयाँ ट्रमा तथा इमरजेन्सी सेन्टर सञ्चालनमा आएपछि अस्पतालको आकस्मिक तथा जटिल चोटपटक उपचार क्षमता थप विस्तार हुने अपेक्षा गरिएको छ । कार्यक्रममा प्राध्यापक डाक्टर सुमनराज ताम्राकार, नेपाल पत्रकार महासंघ काभ्रेका अध्यक्ष विनोद न्यौपाने, जिल्लाका क्रियासिल संचारकर्मीहरुको उपस्थिति रहेको थियो ।