नेकपा एमालेको महाधिवेशनमा नेतृत्वको रस्साकस्सी चलिरहेका बेला तीन जना शीर्ष नेताले सक्रिय राजनीतिबाट अलग हुने घोषणा गरेका छन् । उनीहरूले पार्टी सदस्यता भने कायम राख्ने स्पष्ट गरेका छन् । सक्रिय राजनीतिबाट अवकाश लिने नेताहरूमा उपाध्यक्षद्वय युवाराज ज्ञवाली र अष्टलक्ष्मी शाक्य तथा पार्टीको अनुशासन आयोगका अध्यक्ष केशव बडाल रहेका छन् ।
उनीहरूले अब पार्टीका कुनै पनि पदमा उम्मेदवारी नदिने निर्णय गरेका हुन् । नेकपा एमालेको ११औँ महाधिवेशनका क्रममा नेतृत्वका लागि वरिष्ठ नेताहरूबीच प्रतिस्पर्धा तीव्र भइरहेका बेला तीन नेताले स्वेच्छिक रूपमा अवकाश लिने निर्णय गरेका हुन्, जसलाई उदाहरणीय कदमका रूपमा हेरिएको छ ।
एमालेको जारी महाधिवेशनको बन्दसत्रमा उनीहरूले सक्रिय नेतृत्वबाट बिदा लिए पनि पार्टीप्रति प्रतिबद्ध रहँदै आफ्नो अनुभव र सल्लाहमार्फत योगदान जारी राख्ने बताएका छन् । सात दशक पार गरेका नेताहरूबीच नेतृत्वका लागि होड चलिरहेका बेला उनीहरूको यो निर्णयले पार्टीभित्र नेतृत्व हस्तान्तरण र पुस्तान्तरणको बहसलाई थप बल दिएको छ ।